إزاي توازن بين الشغل والدراسة؟

إزاي توازن بين الشغل والدراسة؟

من غير ما تخسر أي واحدة منهم

أولًا: مين فيهم أهم؟

أول ما هتبتدي تفكر في إجابة على سؤال “مين فيهم أهم” .. من غير أي تفكير هتقرر إن الشغل أهم خصوصًا لو كنت مابتحبش مجال دراستك وكنت مجرد بتدرس عشان الشهادة الجامعية مهمة بالنسبة لك .. لكن الحقيقة هي إن طالما إخترت تشتغل وانت بتدرس فالإتنين مهمين .. ومفيش واحدة منهم أهم من التانية.

ثانيًا: مواعيدك

أكتر حاجة ممكن تضايقك لما تحاول توازن بين شغلك ودراستك هو المواعيد، وإن ممكن جدًا تبقى ساعات عملك في نفس وقت محاضراتك أو دروسك .. وعشان كده حاول ترتب مواعيد شغلك ودراستك بحيث ماتخسرش حاجة من الإتنين.

ثالثًا: الساعات المقفولة
حدد وقت معين في اليوم تقفل الموبايل .. تقفل الانترنت وتقفل كل حاجة وتذاكر
وحدد وقت تاني برضه في اليوم تقفل الموبايل وتقفل الانترنت وتقعد تشتغل

رابعًا: ذاكر أولًا بأول
هي نصيحة قديمة شوية .. بس دي الحقيقة لو كل حاجة أخدتها في دراستك ذاكرتها في نفس اليوم هيبقى سهل عليك تذاكر قبل الامتحان وماتضطرش تاخد أجازة من شغلك عشان تزوّد وقت لمذاكرتك قبل الامتحانات

خامسًا: بُكرة هو حالًا
ماتأجلش حاجة لبُكرة .. الحاجات اللي بتتأجل أغلبها مابياخدش طويل لكن تأجيلها هيفضل مخلّي ذهنك مش صافي ولا هتعرف تركز في الشغل أو المذاكرة

سادسًا: يوم الأجازة
أيام أجازتك من شغلك خليها فرصة إنك تكافيء نفسك على إنك طول الاسبوع قدرت توازن بين شغلك ومذاكرتك وتشوف اصحابك اللي يا إما بيدرسوا أو بيشتغلوا .. وممكن جدًا لو الأجازة أكتر من يوم إسبوعيًا تخلي يوم منهم تعمل فيه الحاجات اللي ناقصة في شغلك أو تراجع فيه على كل اللي إنت أخدته في دراستك طول الإسبوع

سابعًا: ماتعملش جداول
أول حاجة بتيجي في بال أي حد عشان يقسّم وقته بين أكتر من حاجة إنه يعمل جدول لوقته .. الغلط في كده إن عمرك ما هتعرف إنت بتقضي وقت قد إيه في أي حاجة .. لكن هتساعدك جدًا النقطة اللي جاية

ثامنًا: تكنيك بومودورو Pomodoro Technique
تكنيك بومودورو بيتلخص في إنك بتخلي ساعاتك المقفولة اللي بعيدة عن كل الحاجات اللي ممكن تعطلك أو تشغلك عن اللي بتعمله إنها تبقى متقسّمة لفترات أصغر .. فترة طويلة بتشتغل فيها أو بتذاكر وفترة أصغر للراحة.
أفضل الممارسات في الموضوع ده وصلت لإن أفضل مدة للشغل هي 25 دقيقة شغل وبعدها 5 دقايق راحة وبعد كده بومودورو تانية (25 دقيقة شغل) و5 دقايق راحة وهكذا .. وكل أربعة بومودورو بتاخد بعدهم راحة أطول ممكن تبقى ربع ساعه مثلًا وترجع تكمل .. وممكن البومودورو بالنسبة للمذاكرة تبقى 45 دقيقة مذاكرة والراحة ليها تبقى 5 دقايق وكل أربع فترات بومودورو 20 دقيقة راحة.
المفيد في الطريقة دي إنك بتذاكر وعقلك عارف إن فيه وقت هيرتاح فيه وبعد كده تكمل وهكذا .. ده بيخليك تستعيد نشاطك طول الوقت وماتحسش بالإرهاق مهما طالت مدة شغلك لإنك في كل الأحوال على قد شغلك على قد ما هترتاح .. وفي نفس الوقت بتحس إنك بتنجز حاجات كتير في وقت قليل وعمرك ما هتكسّل لإنك في كل الاحوال بتاخد “Break” كل شوية.

تاسعًا: قبل الامتحانات النهائية
ممكن جدًا تاخد أجازة قبل امتحاناتك النهائية أو ترتب شغلك حسب جدول امتحاناتك وتخلص الشغل اللي بتعمله بدري عن معاده شوية عشان وقت الامتحانات يبقى عندك وقت للمذاكرة والتفرغ ليها .. وطبعًا مديرك لازم يعرف بمواعيد إمتحاناتك عشان لو فيه حاجة يقدر يساعدك فيها .. وعشان يبقى عارف الأوقات اللي هتبقى متغيب فيها عن شغلك. زملائك في الشغل كمان لو شغلهم معتمد عليك حاول تخلص الشغل ده بأسرع ما يمكن عشان ماتبقاش بتعطلهم.
أخيرًا: لو هتشتغل وانت بتدرس حاول يبقى شغل
 part-time ومايحتاجش مواعيد ثابتة .. أو شغل من البيت..